ཕྲ་མཉེན་ཚང་ (Microsoft) གི་སྐར་ཁུང་ 10 དེ་འདི་ལོའི་ཕྱི་ཟླ་ ༧ ཚེས་ ༢༩ ཉིན་རྒྱལ་སྤྱིར་ཁྲོམ་འགྲེམས་བྱེད་རྒྱུའི་གསལ་བསྒྲགས་སྤེལ་ཡོད། སྐར་ཁུང་ 7 དང་ སྐར་ཁུང་ 8/8.1 ཡོད་མཁན་ཚོས་དྲ་རྒྱའི་རྒྱུད་སྐར་ཁུང་བཅུ་པའི་ཐོག་རིན་མེད་རིམ་སྤར་བྱས་ཆོག་པ་དང་། སྐར་ཁུང་ 10 ཡོད་མཁན་ཚོར་ཕྲ་མཉེན་ཚང་གི་རིམ་སྟུད་ཀྱི་རྒྱབ་གཉེར་གནང་རྒྱུའི་ཁས་ལེན་བྱས་ཡོད།
ད་ལྟ་སྐར་ཁུང་ 10 བཟོ་བསྐྲུན་ཨང་ Build 10122 ཟིན་ཡོད་པདང་། ཚོད་ལྟའི་ཆེད་ཕབ་ལེན་དུ་འཇོག་ཡོད། འོན་ཀྱང་གློག་ཀླད་ AMD GPU ཡོད་མཁན་ཚོར་སྐར་ཁུང་ 10 གཏན་པོ་མེད་པ་དང་། ཡང་ཡང་ཁ་བརྒྱག་འགྲོ་བའི་གནད་དོན་ཞིག་འཕྲད་བཞིན་ཡོད་འདུག། ཕྲ་མཉེན་ཚང་གི་འགྲེལ་བརྗོད་ལྟར་ན་དེ་ནི་གཙོ་བོ་ད་ཐེངས་སྐར་ཁུང་ 10 པའི་ནང་སྔར་དང་མི་འདྲ་བའི་མཉེན་ཆས་མྱུར་པོ་ཁ་ཕྱེ་ཐུབ་པའི་དབུས་ཀྱི་སྒྲིག་བཀོད་ལ་འགྱུར་བཅོས་བཏང་བའི་རྐྱེན་གྱིས་ཡིན་སྲིད་པ་དང་ཟླ་བ་གཅིག་གི་རྗེས་སྐར་ཁུང་ 10 གཏན་པོ་ཡོང་བ་དང་། ཕབས་ལེན་བྱེད་ཆོག་པར་བཤད།
ལོ་ཤས་གོང་ཕྲ་མཉེན་ཚང་གིས་སྐར་ཁུང་ 8 སྤེལ་ཏེ་དེང་གི་གློག་ཀླད་དང་ཁ་པར་ཚང་མའི་ནང་བེད་སྤྱོད་ཡོང་རྒྱུར་འཚབ་ཚུབ་བྱས་ཡོད། འཚབ་ཚུབ་དེའི་འཁྲོད་དུ་སྐར་ཁུང་གསར་པར་བསྐྱར་ཞིབ་ཡག་པོ་བྱུང་མེད་པ་དང་དགོས་གལ་གྱི་ཆ་མང་པོ་ཞིག་ལེགས་གྲུབ་ཐུབ་མེད། དེར་བརྟེན་གློག་ཀླད་དང་། ཊེབ་ལེཊ། ཁ་པར་སོགས་གློག་ཆས་མང་དུ་སོང་བའི་དུས་སྐབས་སུ་སྐར་ཁུང་བརྒྱད་པའི་གཞི་ཁྱོན་ཆེ་རུ་འགྲོ་མ་ཐུབ་པར་ལྷག་ཡོད། ཕལ་ཆེར་རྒྱུ་མཚན་དེ་ལ་བརྟེན་ནས། ཕྲ་མཉེན་ཚང་གིས་ད་རེས་དུས་ཚོད་ཐུང་ཐུང་ནང་ཐོན་རིམ་གོང་ལས་ལྷག་པའི་སྐར་ཁུང་གསར་སྐྲུན་ལས་གཞི་འདི་བསྟིངས་པ་དང་། སྐར་ཁུང་གི་ཐོན་རིམ་ཨང་དགུ་པའི་ཚབ་ཏུ་བཅུ་པའི་ཐོག་མཆོང་པ་ཡིན་སྲིད།
སྐར་ཁུང་བཅུ་པའི་ཁྱད་ཆོས།
ད་ཐེངས་སྐར་ཁུང་བཅུ་པའི་འགྱུར་བཅོས་མངོན་གསལ་དོད་ཤོས་ནི་ Start གནོན་སའི་འགོ་འཛུགས་སྟེགས་བུ་དེ་ལ་མིང་ Spartan ཞེས་བཏགས་ཡོད་པ་དང་། དེའི་རྣམ་པ་ནི་སྐར་ཁུང་བདུན་པ་དང་བརྒྱད་པ་གཉིས་ཀའི་ཆ་ལྡན་ཡོད། ཡིག་ཆ་དང་མཉེན་ཆས་འཚོལ་བཤེར་སོགས་གཅིག་ལྕོག་ཏུ་སྤྱོད་རུང་བ་ཞིག་ཡིན། སྐར་ཁུང་བཅུ་པའི་ཁྱད་ཆོས་གསར་པ་རྣམས་ཤེས་འདོད་ན། སྐར་ཁུང་བཅུ་པའི་སྐོར་གྱི་རྩོམ་ཡིག་འདིར་གཟིགས་རོགས། http://www.sonamdawa.com/2014/12/window-10.html
སྐར་ཁུང་བཅུ་པ་ཕབས་ལེན།
སྐར་ཁུང་བཅུ་པ་འགྲེམས་བསྒྲགས་བྱེད་པའི་དུས་ཚོད་གཏན་འཁེལ་བའི་ཉིན་ཤས་རྗེས། སྐར་ཁུང་ 7/8/8.1 སྤྱོད་མཁན་མང་པོ་ཞིག་གློག་ཀླད་ཀྱི་ལས་བྱ་སྟེགས་བུའི་ (Taskbar) སྟེང་དུ་གཤམ་གྱི་བརྡ་ཁྱབ་འདི་འཆར་ཡོད། བརྡ་ཁྱབ་འདི་ནི་ད་ཡོད་ཁྱེད་ཀྱིས་སྤྱོད་བཞིན་པའི་སྐར་ཁུང་དེ་སྐར་ཁུང་ 10 ཐོག་རིམ་སྤར་བྱེད་རྒྱུའི་འདེམས་ག་སྤྲད་ཡོད། གལ་ཏེ་རིམ་སྤར་བྱེད་འདོད་ཚེ་ “reserve your free upgrade” ཟེར་བ་དེའི་ཐོག་གནོན་དགོས། ཕབས་ལེན་བྱ་དགོས་རིགས་རྣམས་སྔོན་ཚུད་ནས་རྒྱབ་ལྗོངས་སུ་ཕབ་ལེན་བྱས་པ་དང་། ཕྱི་ཟླ་ ༧ ཚེས་ ༢༩ ཉིན་དུས་གཏན་འཁེལ་བ་ལྟར་ཁྱེད་ཀྱི་སྐར་ཁུང་གསར་འགྱུར་བྱེད་ངེས།
གལ་ཏེ་གོང་ལྟར་མ་ཡོང་ན། རྩིས་འཁོར་གྱི་ Control Panel > System and Security > Window Update ཐོག་གནོན་ནས་ཕབས་ལེན་གྱི་གྲ་སྒྲིག་བྱས་ནའང་འགྲིག
སྐར་ཁུང་གསར་འགྱུར་བྱེད་པར་དུས་ཡུན་ཇི་ཙམ་འགོར་མིན་གཙོ་བོ་གློག་ཀླད་ནང་སྐར་ཁུང་བཅུ་པའི་ཡིག་ཆ་ཕབ་ལེན་བྱས་ཚར་ཡོད་མེད་ལ་རགས་ལས་ཡོད། སྐར་ཁུང་ཕབ་ལེན་ཚར་ན་སྒྲིག་འཇུག་བྱེད་པར་སྐར་མ་ 20 ཡས་མས་འགོར་གྱི་ཡོད་ཚོད།
སྐར་ཁུང་བཅུ་པའི་ཁ་པར།
མཆན།